Ilang Milya Na?

(Lincallo, Merilyn L)

Ilang milya na nga ba ang iyong natahak?

O, kaybilis namang magkaroon ng pakpak

Tinawid ang daan na parang walang lubak

Ginawa ito kahit luha’y pumapatak.

Parang kaylan lang noon tayo’y nagkasama

Musmos man tayo pero laging nasa tama

Ang  yong pagmamahal na aking nadarama

Hiling ko sana, ika’y muling makasama.

Masakit sa damdamin, mahirap tanggapin

Ang iyong paglayo sa puso’y di maatim

Ilang milya na nga ba malayo sa akin

Ang pangungulila, sa puso’y nakatanim.

Nais kong ika’y muling aking masilayan

Kahit isang beses lamang sa isang buwan

Makakulitan lang at makipagkwentuhan

Iyan ang nais ko sana’y ako’y pagbigyan.

Pero alam ko na ikaw ay may layunin

Suportahan kami at ako’y pag-aralin

Pangako ko sayo aking pagbubutihin

Kasipagan ang siya kong paiiralin.

Salamat!,  salamat sa iyo kapatid ko

Alam kong lahat ng ito’y bukal sa iyong puso

Mahal na mahal kita, yan ang tandaan mo

Kahit ilang milya na ang agwat ko sayo.!